Bestu páskar í langan tíma.

Það var furðu margt í ræktinni í morgun - enda fleiri en ég sem tóku daginn snemma og skelltu sér í líkamsrækt til þess að brenna af sér páskakalóríunum. Sjálf var ég í heilsugírnum þessa páskana; át bara grænmeti og hollustu. Lét pákaeggin í friði. Ég varði páskunum í lestur og hvíld og er nú tilbúin í slag næstu viku sem felur m.a. í sér ferðalag á Patreksfjörð ef veður lofar. Þetta er í annað sinni sem ég reyni ferð á Patreksfjörð þar sem ég ætla að vera með fyrirlestur um slysa- og tjónavarnir hjá eldri borgunum og svo hefðbundna forvarnafræðslu meðal framhaldsskólanema.

Í dag verður litli sæti páskaþátturinn minn á dagskrá á rás 1 kl. 16.07. Ég er pínulítið kvíðin - en tel mig þó ekki þurfa að vera það vegna þess að viðmælendur mínir eru svo einstaklega góðir. En maður veit aldrei hvað hlustendum finnst. Það er orðið svo langt síðan ég vann svona samsettan þátt fyrir RUV, auk þess sem tækninni hefur fleygt fram í upptökum. Nú mætir maður ekki lengur með spólurnar sínar undir hendinni og lætur tæknimanninn um klippingarnar. O, nei. Nú þarf ég að klippa sjálf hljóðskrárnar heima í tölvunni minni, geyma þær síðan á diski og síðan sér tæknimaðurinn um að setja þáttinn saman. En vonandi verður þetta í lagi.

Páskahelgin hefur verið ljúf. Lítið um stórsteikur en meira um andlegt fóður. Trén í garðinum klippt og allt klárt fyrir vorið sem mætti alveg fara að láta bera meira á sér. Ég er að velta því fyrir mér hvort ég eigi að leggja á Hellisheiðina og heimsækja systur mína í Kríumýri, austan Selfoss. Gæti líka hugsað mér að fara í göngutúr með Tinnu, labradorhund sonar míns og tengdadóttur. Veit ekki hvað verður ofan á og læt það ráðast á meðan ég hlusta á fréttirnar. Heyri að ein bílvelta hafi orðið um páskana. Vona að það sé ekki alvarlegt.

 

Athugasemdir

[Lilja Guðrún Þorvaldsdóttir, 24.3.2008 kl. 17:58]

Takk fyrir góðan og skemmtilegan þátt elsku Ragnheiður mín, þessi kvíði þinn sem ég les um hér að ofan, var bara óþarfa orkueyðsla í vitlausa átt.  Þú nefnilega virðist hafa hitt á réttan punkt, þegar þér varð fótaskortur á tungunni við meðferð ritningarinnar sem þú valdir þér á fermingardaginn:  Drottinn er minn hirðir mig mun ekkert "skorta," .  Það kom berlega í ljós í þættinum,  að þig skorti ekki virðinguna fyrir viðfangsefni þínu og viðmælendum þínum, hvort sem þeir voru ungir eða aldnir. Og þeir áratugir sem ég hef fylgst með þér í leik og starfi hefur þig ekki skort virðinguna fyrir "verkefninu" sem þú tekur að þér hverju sinni,  virðingin hefur verið þinn "aðall" og þú hefur gefið þig í það af lífi og sál.  Eins og kom skýrt fram í þættinum, til okkar sem hlustuðum. 

     Af öllum öðrum ólöstuðum, verð ég að segja að, mikið rosalega var gaman að hlusta á ungu stúlkuna, með englaröddina, sem söng eins og engill og var svo vel máli farin og  skemmtileg.  Maður  óttast ekki um framtíð landsins þegar maður heyrir svona heillandi ungmenni tala.  Takk enn og aftur. 

[Ragnheiður Ólafía Davíðsdóttir, 24.3.2008 kl. 21:26]

Sæl, elsku Lilja mín. Mér þykir ótrúlega vænt um að þér líkaði þátturinn minn - ekki síst vegna þess að þar talar fagkona. Það er orðið svo langt síðan ég vann svona samsettan þátt og var því hálf óörugg. Unga stúlkan sem talaði og söng er sonrdóttir mín og því voru hæg heimatökin að fá hana til að taka þátt í þessu. Ég er mjög stolt af henni. Hún syngur eins og engill.

Mikið langar mig til að hitta ykkur stelpurnar á nú og viðra eina frábæra hugmynd við ykkur. Það koma nefnilega upp í hendurnar á mér verkefni fyrir okkur; stórt verkefni sem er eins og sniðið að því sem við gerum best. Það er mannúðarverkefni sem tengist afleiðingum umferðarslysa.

Við ættum nú að hittast og spjalla. Enn og aftur; kærar þakkir fyrir þitt fallega innlegg. Knús. Ragnheiður

[Lilja Guðrún Þorvaldsdóttir, 26.3.2008 kl. 02:16]

Er þetta annar tvíburinn þinn?., til hamingju með hana, hún var alveg æðisleg. (á nú ekki langt að sækja það). -  Já, heyrðu hvernig væri að drífa í, að hittast, og skella okkur af stað í nýtt verkefni.  Til er ég.