Hraðamælingar í dagvinnu!

Ég bý við Heiðvang í Hafnarfirði; friðsæla íbúðagötu sem loku er í annan endann og gegnumakstur því ekki mögulegur. Í götunni hefur borið á hraðakstri og þá sérstaklega á kvöldin og um helgar. Íbúar við götuna gerðu athugasemdir og höfðu samband við bæjaryfirvöld í Hafnarfirði í þeirri von að brugðist yrði við með einhverjum hætti.

Í gær birtust bæjarstarfsmenn með hraðamælingatæki á vagni sem segir til um og skráðir umferðarhraða í götunni. Þannig hyggjast umferðaryfirvöld kanna hver raunverulegur hraði er í götunni, áður en ákveðið verður hvernig brugðist skuli við. Tæki, sem er á vagni á hjólum, var komið á staðinn kl 8 um morguninn en síðan brá svo við að það var tekið niður fyrir klukkan 5 í eftirmiðdaginn! Þetta þótti okkur íbúunum einkennileg aðgerð við hraðamælingar þar sem aðal hraðaksturinn á sér yfirleitt stað eftir klukkan fimm á daginn og einnig um helgar. Ég spurðist fyrir um ástæður þess að vagninn var fjarlægður og svörin sem ég fékk hjá Þjónustumiðstöð bæjarins og frá konu sem heitir Helga var að verkamennirnir ynnu aðeins í dagvinnu og því yrði að taka vagninn fyrir vinnulok þeirra. Ef vagninn stæði fram eftir kvöldi eða um helgar væri hætta á að hann yrði skemmdur! Ég spurði þá hvort hann mætti ekki standa að minnsta kosti til klukkan 8 á kvöldin en þá kom það svar að þá yrði að greiða verkamönnunum yfirvinnu!

Ég hef skipt mér lengi að umferðarmálum í landinu og hef aldrei orðið vör við að umferðarslysin og hraðaksturinn takmarkaðist aðeins við dagvinnutíma.

Athugasemdir

[Lilja Guðrún Þorvaldsdóttir, 17.5.2008 kl. 00:14]

Það er náttúrulega skandall að umferðaslysin og hraðaksturinn skuli ekki sjá sóma sinn í því að færa "iðju" sína yfir á dagvinnutíma, í stað þess að dreifa þessum óskunda svona í tíma og ótíma allan sólarhringinn.  Skyldi Davíð vita af þessu?