Erfitt að halda sig frá vinnunni.

Það getur verið erfitt að vera veikur - sérstaklega í starfi eins mínu þar sem tíminn er fyrirfram ákveðinn og bókanir á hinum ýmsu atburðum. Hið slysalega atvik á Suðurlandsveginum á þriðjudagsmorguninn setti öll mín plön í uppnám. Útvarpsþátturinn minn var ekki unninn, forvarnafundum frestað og svo mætti lengi telja. Þessa dagana er ég að ná kröftum eftir þetta skelfilega krampakast en ég er nánast lurkum lamin eftir ósköpin; með harðsperrur í öllum líkamanum, stingi í höfðinu og máttlaus eins og slytti. Í morgun fór ég í heilalínurit og í næstu viku halda áfram ýmsar rannsóknir. Krafturinn í vinstri helmingi líkamans er að koma til baka og allt á góðri leið. Eftir stendur samt óvissan. Hvað olli þessu? Það er verst að takast á við óvissuna. En vonandi kemur eitthvað út úr öllum þessum rannsóknum svo hægt verði að takast á við þennan "sjúkdóm" sem vissulega setti líf mitt á annan endann. En... ég er dugleg í Pollíönnuleiknum og hann hefur reynst mér vel.

Nú sit ég hér við tölvuna og svitna við það eitt að skrifa á lyklaborðið.  Úti er dásamlegt veður sem ég hefði alveg kosið að nýta í annað en veikindi hér heima. "Þú ert slæmur sjúklingur" sagði Jói minn og meinti að ég tæki veikindin ekki nógu alvarlega. Ég væri sífellt að svara tölvupósti og redda málum í vinnunni. Það kann að vera rétt - en ég er nú einu sinni þannig að ég vil standa við gefin loforð svo fremi sem ég stend á fótunum. Á laugardaginn var ég búin að lofa mér á námskeið hjá Rauða krossinum þar sem ég átti að tala um forvarnir í hestamennsku. Dagurinn í dag hefur farið í að reyna að finna staðgengil minn, senda upplýsingar og fræðsluefni frá mér og senda afboðanir á fundi og mannamót sem ég var bókuð á.

Mér finnst þetta slæmt mál og get ekki beðið eftir því að batna og halda á, eins og amma mín sagði alltaf uppá vestfirskuna.

Athugasemdir

[Anna Ólafsdóttir (anno) (IP-tala skráð) 10.4.2008 kl. 23:01]

Takk fyrir að leyfa okkur bloggvinunum að fylgjast með hvernig gengur. Farðu nú vel með sjálfa þig. Hugsa til þín á hverjum degi, vonandi næ ég að senda einhverja strauma sem gefa orku.

[Lilja Guðrún Þorvaldsdóttir, 10.4.2008 kl. 23:01]

Elsku Ragnheiður mín!  Gegndu nú honum Jóa þínum og vertu góður sjúklingur, þá nærðu örugglega fyrr heilsu þinni aftur.  Ef þú ert með erindin á blaði þá  má alltaf finna  einhverja til að flytja  þau fyrir þig. -  Ég sá innslag í Kastljósinu í gær um forvarnir í  hestamennsku, s.s.  sérstakan útbúnað í úlpu og vesti, og svo  auðvitað  nauðsyn hjálmanna. -  Svo heyrði ég ekki betur, en að alvarlegustu slysin hentu aðallega þá sem vinna við hesta, þ. e.a.s. þá með allra mestu reynsluna.  Athyglisvert. En þú verður að fara vel með þig. Heilsan er það dýrmætasta sem maður á.

[Eyþór Árnason, 11.4.2008 kl. 00:49]

Farðu vel með þig. Lestu smá blogg og hvíldu þig svo. Kveðja.

[Steingerður Steinarsdóttir, 11.4.2008 kl. 10:29]

Góðan bata Ragheiður mín. Passaðu að ofgera þér ekki.