Skatan var rauð í sárið og kæfandi góð!

Eins og undanfarin ár bauð eldri sonurinn okkur foreldrum sínum, tengdaforeldrum, ömmu sinni og fleira góðu fólki í skötu í Perlunni. Skatan var frábær; rauð í sárið og vel kæst. Hnoðmörinn var eins og hann gerist bestur að vestan og félagsskapurinn ekki leiðinlegur. Tengdadóttir mín, sem á von á barni, blómstraði í dag - enda á hún afmæli og var því skötuveislan nokkurs konar afmælisveisla í leiðinni.

Örverpið mitt, Jökull, er að vinna í Hans Pedersen fram á kvöld og missti því af skötunni. Strákarnir mínir báðir eru aldir upp við hefðir foreldranna og eta því bæði þorramat og skötu og eru alveg lausir við matvendni. Það eiga þeir ekki síður afa og ömmu í Skerjafirði (föðurfólkið) að þakka - enda var þar jafnan rammíslensku matur á borðum.

Þetta mun vera í fyrsta skipti frá því ég fór að búa að ég er búin að undirbúa jólin tímanlega. Nú bíðum við Jói eftir jólunum við kertaljós og jólakveðjur. Seinni skata dagsins er síðan stundvíslega klukkan sex þegar ég mæti til "bróður míns" Jóhanns Davíðssonar, sem reyndar er ekki genatískur bróðir minn - heldur góður félagi úr lögreglunni sem heldur ótrúlega skötuveislu í bílskúrnum sínum í Kópavogi. Konan hans, Gógó, er vestfirsk valkyrja frá Súgandafirði og víst er að hún kann að meta skötuna, eins og hún á kyn til. Í þeirri dásamlegu veislu hitti ég gamla félaga úr lögreglunni og fleira gott fólk sem mætir til Jóa "bróður" árlega í skötu.

Í fyrramálið höldum við Jói af stað um níuleytið (þ.e.a.s. Jói maðurinn minn) og förum okkar árlega rúnt í kirkjugarðana. Það er alltaf hátíðleg stund - þótt vissulega fylgi því söknuður. Í Grafarvogskirkjugarði vinnur dásamleg kona sem staðið hefur vaktina á aðfangadegi frá því ég koma þangað fyrst í þessum erindum. Hún kann að umgangast syrgjendur og er bæði hlý og gefandi kona. Í litla skrifstofuhúsinu hennar í garðinum er ljós á kertum og  konfekt og kaffi. Þessi kona, sem ég veit ekki hvað heitir, er sannarlega sínu erfiða starfi vaxin.

Það er dásamlegt hér í Hafnarfirðinum núna. Ég finn næstum því fyrir jólunum - sem senn taka landið.

Gleðileg jól.

Athugasemdir

[Lára Hanna Einarsdóttir, 23.12.2007 kl. 17:51]

Gleðileg jól, Ragnheiður mín...  skilaðu kveðju frá mér til allra þinna og kysstu Jóa!  Heyrumst þegar ég kem aftur heim. 

[Anna Ólafsdóttir (anno) (IP-tala skráð) 23.12.2007 kl. 20:54]

Óska þér gleði og gæfuríkra jóla og farsæls komandi árs. Takk fyrir ánægjuleg samskipti í bloggheimum á árinu sem er að líða 

[Anna Gísladóttir, 24.12.2007 kl. 01:10]

Gleðilega jólahátíð og farsælt komandi ár

[Jóhann Páll Símonarson, 24.12.2007 kl. 16:21]

Ragnheiður.

Gleðileg jól. Megi guð og gæfa vera með þér og fjölskyldu þinni.

Jólakveðja.

Jóhann Páll Símonarson.