Nánin kynni af Dr. RUV

Það var notaleg stund í vikunni þegar ég vann fyrsta útvarpsþáttinn minn í langan tíma. Ég tók að mér að vera einn umsjónarmanna neytendaþáttarins Dr. RUV sem sendur er út daglega á Rás 1 kl. 15.30. Ég sé um fimmtudagana þegar fjallað er um samgöngu- og umhverfismál. Það var vissulega gaman að hitta aftur gamla félaga á Ríkisútvarpinu þar sem ég starfaði langdvölum í eina tíð með hina ýmsu útvarpsþætti. Ég hlakka til að takast á við verkefni vetrarins í þáttagerð fyrir þessa rótgrónu stofnun sem mér þykir svo vænt um. Af nógu er að taka í umfjöllunarefnum en fyrsti þátturinn fjallaði um meindýr úr ríki skordýranna.

Það er svo undarlegt að hafi maður einu sinni verið framan við hljóðnemanna er eins og sú vinna gleymist ekki; rétt eins og maður kann alla tíða að hjóla hafi maður einu sinni lært það. Tækninni hafði að vísu fleygt fram í formi upptökutækja og klippitækja - en að öðru leyti hafði fátt breyst. Gamli góði andinn sveif ennþá yfir vötnum gömlu Gufunnar; sá hinn sami og ég kynntist þegar ég byrjaði mína útvarpsmennsku á Skúlagötu 4. Það var skemmtileg upplifun.

Athugasemdir

[Kjartan Pálmarsson, 18.9.2007 kl. 15:07]

Til hamingju með að vera komin að hljóðnemanum aftur, ég verð með eyrun á viðtækinu á fimmtudaginn kemur. Hlakka til að heyra frá þér á gömlu góðu gufunni